"Halik ni Higad"

"Halik ni Higad"

by:

Virgilio F. De leon Jr. MD

Isang araw , sa lugar sa UP College Baguio na kung tawagin ay Manang Mani. Alam ko ang iniisip niyo na di taga UP Baguio , lehitimo ang binebenta ni Manang na Mani. May Roasted. May Steamed. Walang hanky panky. Pure Mani lang. 

Pero di yun ang kuwento ko sa araw na ito. Ito ay tungkol sa akin at sa unang higad na naging first kiss ko. Naunang higad na nakahalik sa akin.(Sa pagkaalalam ko eh di naman na nasundan).

Nung araw na yun ay naisipan kung umupo sa ilalim ng mga Pinus Insulares sa maliit na parke sa ibabaw lang ni Manang Mani. Masarap ang hangin. Malayo ang matinding araw. Naririnig ko ang mga nagdaraanang mga Iskolar ng bayan na nagmamadaling pumasok. Ako , tumambay lang kasi di dumating ang aming mahal na propesor. Di ko na maalala kung anong klase pero ang naalala ko sa araw na yun ay ang halik.

Sa lilim ng isang pine tree ay napagkatuwaan kung umupo at isandal ang aking likod. Inaantok na ako sa puwesto ko. Naghikab ako sabay tingin sa itaas kung saan nakita ko ang isang bagay na nahuhulog. Para eksena sa pelikula. Slow motion. Palapit nang palapit sa akin. Gumagalaw ng kaunti. Maraming mga paa. Mga tinik na nagkalat sa kahabaan ng itim nitong katawan. Parang mabagal kaya akala ko may oras pang makaiwas pero mali ang akala ko. Parang rumaragasang tren na di mapigilan. Pinilit kong ipihit ang aking katawan pakaliwa. Sapul pa din. Saktong dumampi ang mga maliliit na tinik ng higad sa aking kanang pisngi.

Tayo. Sigaw. Pasok ang kamay sa jacket at inalis ang nakapatong pa na insekto. Tayo. Sigaw. Ikot ikot.

Nakita ako ng mga kaibigan ko. Namumula na ang kanang pisngi. Nagiging kamukha ko na si Two-Face! Lumabas ng campus at pumara ng taxi. Umuwi ng dormitoryo. At ang isa sa pinakamalaking pagkakamali ng buhay ko. Naligo. Huli ng naisip ko na baka kumalat ang maliliit na tinik ng higad sa katawan ko. 

Nasilip ko na lang sa salamin. Kalahati ng mukha at katawan ko ay pulang pula na. Nangangati. Naalala ang Benadryl sa Ref. Nilaklak. Di na nagkutsara.Tinunnga na lang na parang yakult. Pangalawang pagkakamali.

Inaantok. Plakda sa higaan.Di na nakapasok.

Nagising. Nilalamig. Nakatulog na nakahubad. Pulang pula pa din ang katawan. Bad trip. Ayaw ko nang magpahalik sa Higad. 

XXXXXXXXXXXXXXXXXXXXXXXXXXXXXXXXXXXXX

Salamat Raven Knives sa Sobrang Linaw na Larawan.